खोटाङ । साकेला गाउँपालिका–१ बाँझेच्यानडाँडाको रातमाटेमा गोठमा आगलागी हुँदा ७० वर्षीय वृद्ध धिरजबहादुर राईको मृत्यु भएको छ ।
परिवारबाट छुट्टिएर एक्लै बस्दै आएका राई बुधबार आफ्नै गोठमा मृत अवस्थामा फेला परेका हुन् । उनी विगत एक वर्षदेखि गोठमै बस्दै सुन्तलाखेती र सुँगुरपालन गर्दै आएका थिए ।
प्रारम्भिक अनुमानअनुसार गोठमा उनले अगेनामा बालेको आगो सल्किएर आगलागी भएको हुन सक्ने देखिएको छ । सोही आगलागीमा परी राईको मृत्यु भएको आशङ्का गरिएको छ । यद्यपि आगलागी कसरी सुरु भयो र घटना कुन समयमा भएको हो भन्नेबारे यकिन हुन सकेको छैन ।
स्थानीय वडाध्यक्ष हेमन राईका अनुसार गोठ एकान्त स्थानमा रहेकाले आगलागी भएको समयमा कसैले जानकारी पाउन नसकेको हुन सक्छ ।
घटनाको जानकारी पाएलगत्तै जिल्ला प्रहरी कार्यालय खोटाङबाट प्रहरी टोली घटनास्थल पुगेको थियो । जिल्ला प्रहरी कार्यालय खोटाङका प्रमुख प्रहरी नायब उपरीक्षक प्रकाश बुढाथोकीका अनुसार घटनाबारे अनुसन्धान भइरहेको छ । मृतक राईको शव परीक्षणका लागि जिल्ला अस्पताल खोटाङ पठाइएको प्रहरीले जनाएको छ ।
प्रहरी अनुसन्धान र शव परीक्षणको प्रतिवेदनपछि घटनाको वास्तविक कारण तथा मृत्युको अवस्थाबारे थप तथ्य खुल्ने अपेक्षा गरिएको छ ।
