सोलुखुम्बु । सोलुखुम्बुबाट जटिल स्वास्थ्य अवस्थाकी एक सुत्केरी र नवजात शिशुको हेलिकप्टरमार्फत उद्धार गरी थप उपचारका लागि काठमाडौं पठाइएको छ ।
सोलुदूधकुण्ड नगरपालिका–८ की २४ वर्षीया कल्पना बस्नेत र उनको नवजात शिशुलाई जिल्ला अस्पताल फाप्लुमा उपचार सम्भव नभएपछि शुक्रबार हेलिकप्टरमार्फत काठमाडौं लगिएको जिल्ला प्रशासन कार्यालय सोलुखुम्बुले जनाएको छ ।
बस्नेतले गर्भावस्थाको २४औँ हप्तामै शिशुलाई जन्म दिएकी थिइन् । समयअगावै जन्मिएका कारण नवजात शिशुमा श्वासप्रश्वाससम्बन्धी गम्भीर समस्या देखिएको थियो । शिशुलाई सघन नवजात शिशु उपचार कक्ष (एनआईसीयू) मा राखेर तत्काल उपचार गर्नुपर्ने भए पनि जिल्ला अस्पताल फाप्लुमा उक्त सेवा उपलब्ध थिएन ।
आमा र शिशुको जटिल स्वास्थ्य अवस्थालाई ध्यानमा राख्दै जिल्ला अस्पताल फाप्लुको सिफारिस तथा चिकित्सकको रेफर पत्रका आधारमा जिल्ला प्रशासन कार्यालयले हवाई उद्धारका लागि पहल गरेको थियो ।
प्रशासनले राष्ट्रपति महिला उद्धार कार्यक्रमअन्तर्गत हेलिकप्टरको व्यवस्था गरिदिन महिला, बालबालिका तथा ज्येष्ठ नागरिक मन्त्रालयलाई अनुरोध गरेपछि उद्धार सम्भव भएको जनाएको छ ।
हेलिकप्टरमार्फत काठमाडौं पुर्याइएका आमा र शिशुको थप उपचारका लागि त्रिवि शिक्षण अस्पताल वा थापाथलीस्थित प्रसूति गृहमा पठाइएको प्रशासनले जनाएको छ ।
