काठमाडौं, २९ कात्तिक । हिन्दु धर्मावलम्बीहरूको महत्त्वपूर्ण पर्व छठको मुख्य दिन आज देशभर अस्ताउँदो सूर्यलाई पूजा आराधना गरी अर्घ्य दिइँदैछ ।
चार दिनसम्म मनाइने छठ पर्व शुक्रबारदेखि सुरु भएको हो । यस पर्वमा व्रतालुहरूले सूर्यदेव र छठी माताको पूजा आराधना गर्दै परिवारको सुख, शान्ति, समृद्धि तथा सुस्वास्थ्यको कामना गर्ने धार्मिक परम्परा छ ।
छठको मुख्य दिन आज व्रतालुहरू दिनभर निराहार व्रत बसेर साँझ जलाशय तथा नदी किनारमा पुगेर अस्ताउँदो सूर्यलाई फलफूल, प्रसाद र अन्य पूजासामग्रीसहित अर्घ्य अर्पण गर्नेछन् ।
पर्वको अन्तिम दिन भोलि बिहान उदाउँदो सूर्यलाई अर्घ्य दिएपछि चारदिने छठ पर्व विधिपूर्वक समापन हुनेछ ।
कुनै समय तराईका सीमित क्षेत्रमा मात्र मनाइने छठ पर्व पछिल्लो समय काठमाडौं उपत्यकासहित देशका विभिन्न स्थानमा समेत व्यापक रूपमा मनाउन थालिएको छ । यस अवसरमा राजधानीका गुह्येश्वरी, गौरीघाट, कमलपोखरी, नागपोखरीलगायत स्थानमा छठ पूजाका लागि विशेष सजावट गरिएको छ ।
प्रकृति र सूर्यप्रतिको श्रद्धा तथा आस्थासँग जोडिएको छठ पर्वमा व्रतालुहरूले शुद्धता, संयम र धार्मिक विधिलाई विशेष महत्त्व दिने गर्छन् ।
