काठमाडौँ । पश्चिम नेपाल भूकम्पबाट क्षति भएका निजी घरहरूको पुनर्निर्माणका लागि विस्तृत क्षति आंकलन गर्न प्राविधिकसहितको टोली जाजरकोट र रुकुम पश्चिम पुगेको छ ।
प्राधिकरणका उपसचिवहरु वेदनिधि खनाल, सुदीप विक्रम भट्ट र रामबहादुर केसीसहितको टोलीले आज जाजरकोट पुगेर त्यहाँका स्थानीय पालिका, सहरी विकास मन्त्रालय, राष्ट्रिय तथा अन्तर्राष्ट्रिय गैर सरकारी संस्थाबाट खटिएका इन्जिनियरहरूलाई तालिम दिएको छ ।
उनीहरू पर्सिदेखि फिल्डमा खटिनेछन् । रुकुम पश्चिममा पर्सि र निकपर्सि तालिम सम्पन्न गरी टोली खटिने राष्ट्रिय विपद् जोखिम न्यूनिकरण तथा व्यवस्थापन प्राधिकरणका कार्यकारी प्रमुख डा भिष्म कुमार भुसालले बताउनुभयो ।
यसपछि रुकुम पश्चिमको आठविसकोट नगरपालिकामा तालिम सम्पन्न गरी अर्को टोली त्यहाँको विस्तृत क्षति आंकलन गर्न खटिने छ ।
पुल्चोक इन्जिनियरिङ्ग अध्ययन संस्थानको प्राविधिक टोलीले पनि आजदेखि जाजरकोटको भेरी नगरपालिका र नलगाढ नगरपालिकाका विभिन्न वडाहरुमा विस्तृत क्षति आंकलन सुरु गरिसकेको छ ।
