सोलुखुम्बु, कात्तिक १९ । उज्यालो नेपाल पार्टीले सोलुखुम्बुबाट प्रतिनिधिसभा सदस्य निर्वाचनमा प्रत्यक्षतर्फ उम्मेदवारी दिएका युवा नेता पेम्बा छिरी शेर्पालाई सम्मानपत्र प्रदान गरेको छ ।
खुम्बु पासाङल्हामु गाउँपालिकाका शेर्पाले पहिलोपटक प्रतिनिधिसभा सदस्य निर्वाचनमा प्रत्यक्षतर्फ उम्मेदवारी दिएका थिए । निर्वाचनमा सफलता हासिल गर्न नसके पनि उनको राजनीतिक सक्रियता, साहस र योगदानको कदर गर्दै पार्टीले सम्मान गरेको जनाएको छ ।
समग्र खुम्बुको राजनीतिक इतिहासमा प्रतिनिधिसभा सदस्यको प्रत्यक्ष निर्वाचनमा उम्मेदवारी दिने युवा नेताका रूपमा शेर्पाको सहभागितालाई अर्थपूर्ण मानिएको छ । पार्टीले उनको राजनीतिक यात्रा, समर्पण तथा जनताको सेवाप्रतिको प्रतिबद्धताको कदर गर्दै सम्मानपत्र प्रदान गरेको हो ।
युवा नेतृत्वलाई प्रोत्साहन गर्ने उद्देश्यले गरिएको यस सम्मानले शेर्पाको आगामी राजनीतिक यात्रामा थप ऊर्जा र प्रेरणा मिल्ने विश्वास व्यक्त गरिएको छ । साथै, खुम्बुको राजनीतिमा युवा सहभागिता र नेतृत्व विकासका लागि यसले सकारात्मक सन्देश प्रवाह गर्ने अपेक्षा गरिएको छ ।
सम्मान प्राप्त गरेपछि विभिन्न क्षेत्रबाट शेर्पालाई बधाई तथा आगामी राजनीतिक यात्राको सफलताको शुभकामना व्यक्त गरिएको छ ।
