ओखलढुंगा । ओखलढुंगामा जुवातास खेलिरहेको अवस्थामा सात जना पक्राउ परेका छन्। प्रहरीले उनीहरूको साथबाट ४२ हजार २० रुपैयाँ नगद र तास बरामद गरेको छ।
जिल्ला प्रहरी कार्यालय ओखलढुंगाका अनुसार सिद्धिचरण नगरपालिका–१२ स्थित जिविस टोलमा रहेको सुमन किराना पसल तथा होटलमा जुवातास खेल भइरहेको गोप्य सूचना प्राप्त भएपछि बिहीबार दिउँसो प्रहरी टोली खटिएको थियो। सोही क्रममा जुवातास खेलिरहेको अवस्थामा सात जनालाई नियन्त्रणमा लिइएको हो।
पक्राउ पर्नेमा सिद्धिचरण नगरपालिका–११ का नृपध्वज कटवाल, वडा नम्बर १२ का चक्रबहादुर राई र बुद्धिकुमार राई, वडा नम्बर ९ का हिरा कार्की, सुनकोशी गाउँपालिका–८ का रोहितकुमार कटवाल, वडा नम्बर १० का दण्डी गिरी तथा मोलुङ गाउँपालिका–२ घर भई हाल सिद्धिचरण नगरपालिका–१२ बस्ने डम्बरकुमारी थापा कार्की (संगिता) रहेका छन्।
प्रहरीले उनीहरूको साथबाट ४२ हजार २० रुपैयाँ नगद र तास बरामद गरेको जनाएको छ।
पक्राउ परेका सातै जनालाई थप अनुसन्धान तथा आवश्यक कानुनी कारबाहीका लागि जिल्ला प्रहरी कार्यालय ओखलढुंगामा ल्याइएको जिल्ला प्रहरी कार्यालयका प्रहरी निरीक्षक एवं सूचना अधिकारी ईश्वर अधिकारीले जानकारी दिएका छन्।
घटनाबारे प्रहरीले थप अनुसन्धान गरिरहेको जनाएको छ।
