स्वर्णलक्ष्मी सहकारी ठगी प्रकरणको अनुसन्धान प्रतिवेदन प्रहरीले बुझायो

राष्ट्रिय स्वतन्त्र पार्टी (रास्वपा) सभापति रवि लामिछाने जोडिएको काठमाडौँको स्वर्णलक्ष्मी सहकारी ठगी प्रकरणको अनुसन्धान प्रतिवेदन प्रहरीले आज बुझाएको छ । काठमाडौँ प्रहरीले लामिछानेसहित ४४ जनालाई प्रतिवादी बनाउनुपर्ने रायसहितको अनुसन्धान प्रतिवेदन तयार पारेर अनुुसन्धान प्रतिवेदन बुझाएको हो । प्रहरीले अनुसन्धान प्रतिवेदन भोलि जिल्ला सरकारी वकिल कार्यालय काठमाडौँमा पेस गरेको काठमाडौं प्रहरीका एसपी नवराज अधिकारीले जानकारी दिनुभयो । ४४ जना प्रतिवादीबाट प्रहरीले १ अर्ब १९ करोड ४९ लाख रुपैयाँ बिगो मागदावी लिनुपर्ने राय दिएको छ । स्वर्णलक्ष्मी सहकारीको रकम अपचलनमा संलग्न लामिछानेसहित जीबी राई, पूर्वडीआईजी छविलाल जोशी, दीपक लामा, कोषाध्यक्ष कुमार रम्तेल र व्यवस्थापक नवीन अछामीसहित ४४ जनालाई प्रतिवादी कायम गर्नुपर्ने राय प्रहरीले दिएको छ । कार्तिक २१ मा सहकारी लेखा समिति सदस्य सुनिता नेवा र कार्तिक २६ मा ऋण उपसमिति सदस्य कमल लामालाई पक्राउ गरी काठमाडौं प्रहरीले अनुसन्धान थालेको थियो । रवि र छविविरुद्ध हाल पोखरा जिल्ला अदालतमा थुनछेक बहस जारी छ । उनीहरूमाथि पोखराको सूर्यदर्शन सहकारीको रकम अपचलनबारे प्रहरीले पक्राउ गरी अनुसन्धान थालेको थियो । स्वर्णलक्ष्मीको रकम ठगी प्रकरणबारे बयान लिन पोखराबाट काठमाडौँ ल्याइएको थियो ।