रामेछापमा राष्ट्रिय जनगणना २०७८ सम्वन्धि जागरण तथा अभिमूखिकरण कार्यक्रम सम्पन्न

रामेछाप (नुम्बुर खबर) । रामेछापमा लोपोन्मुख शेर्पा संस्कृतिलाई जीवित राख्न नेपाल शेर्पा संघ वडा कार्यसमिति उमाकुण्ड-३ कुम्बुँकास्थलीद्वारा आयोजित पाँच दिने शेर्पा संस्कृति प्रशिक्षण कार्यक्रमको तेस्रो दिनमा जनगणना २०७८ सम्वन्धी जागरण कार्यक्रम सम्पन्न भएको छ ।

शेर्पाहरूको संस्कृतिलाई संरक्षण गर्न उमाकुण्ड गाउँपालिका, ३ नं. वडा कार्यालय कुम्बुँकास्थलीको आर्थिक सहयोगमा सञ्चालित उक्त कार्यक्रममा उमाकुण्ड र गोकुलगंगा गाउँपालिकाको लगभग १५० जना भन्दा बढी सहभागीहरूले उक्त कार्यक्रममा भाग लिदै आउनुभएका छन् ।

शेर्पाहरूको ल‍ोप हुन लागेको विवाह सम्बन्धी टासी गीत, यिटु, सिली, गेलिङ र स्यब्रुको प्रशिक्षण हुदै गरेको कार्यक्रमको सहजीकरण गर्न धर्मगुरू दानुरी शेर्पा र मिङमार शेर्पा(लामा) तथा स्यब्रु प्रशिक्षक कुसाङ छोटी शेर्पा र डोमा शेर्पाले गर्नुभएको छ ।

सोही कार्यक्रमको तेस्रो दिन आज राष्ट्रिय जनगणना २०७८ सम्वन्धि जागरण तथा अभिमूखिकरण कार्यक्रम सम्पन्न भएको छ । कार्यक्रम नेपाल शेर्पा संघको संघीय सह कोषाध्यक्ष बाबू काजी शेर्पाको संयोजकत्वमा भएको थियोे ।

जागरण तथा अन्तक्र्रिया कार्यक्रममा आगामी जनगणना २०७८ मा कोही पनि शेर्पाहरु नछुटिउन र विवरणहरु सही रुपमा टिपाउन सजक गराउने हेतुले आयोजना गरिएको नेपाल शेर्पा संघ संघीय सह कोषाध्यक्ष बाबु काजी शेर्पाले जानकारी दिए ।

कार्यक्रममा शेर्पाले जनगणनाको आवश्यकता, महत्व र हाम्रो भूमिकाको बारेमा विचार राखे । जनगणनाले पार्ने आर्थिक, सामाजिक, राजनैतिक लगायत सबै क्षेत्रमा असर र प्रभाव पार्ने भएकाले सबै चनाखो हुनुपर्नेमा सह कोषाध्यक्ष शेर्पाले जोड दिए ।

अन्तक्र्रियामा नेपाल शेर्पा संघको नीति, योजना र अघि सारेका कार्यक्रमका बारेमा शेर्पाले सहजिकरण गरे । शेर्पा भाषाको एप्लिकेसन, शेर्पा संघसंस्थासँग समन्वय लगायतका विषयमा शेर्पाले प्रष्ट पारे ।

नीति, निर्माण, राज्यको सेवा सुविधा लगायतका क्षेत्रमा जनसंख्याले प्रभाव पार्ने बताउँदै रामेछाप शेर्पा किदुगको अध्यक्ष ल्हाक्पा तेन्जी शेर्पाले १०–१० बर्षमा मात्रै जनगणना हुने भएकाले सबैले यसमा चासो राख्नुपर्ने बताए ।

कार्यक्रम बोल्दै नेपाल शेर्पा संघ उमाकुण्ड गाउँपालिकाको अध्यक्ष पेमनुरी शेर्पाले राष्ट्रिय जनगणना २०७८ मा शेर्पा समुदायको यथेष्ठ जनसंख्या पत्ता लगाई राज्यको हरेक निकायमा शेर्पा समुदायको व्यापक सहभागिता गराउने मूल धेय रहेको भन्दै हाम्रो अधिकार स्थापित गर्दै राज्यको हरेक तह तप्कामा सहभागिताका लागि जनगणनाले विशेष महत्व हुने हुदा यसलाई सार्थक बनाउन हामी लाग्नुपर्ने बताए ।

हामी शेर्पाहरूको बीचमा यस्तो सचेतना मुलक जागरण कार्यक्रम सञ्चालन गरिएको कारण खुसी व्यक्त गर्दै नेपाल शेर्पा संघ रामेछाप जिल्ला कार्यसमितिको सह सचिव नुर्बु शेर्पाले अन्य स्थानमा पनि आगामी दिनमा शेर्पा समुदायमा शेर्पा संस्कृति जगेर्ना गर्ने कार्यक्रम सञ्चालनको निम्ति पहल गर्न संघीय समितिलाई आह्वान गरिएको छ ।

शेर्पा संस्कृति संरक्षणकाे निम्ति यस्तो सराहनीय कार्य गरेको भन्दै अन्य वक्ताहरूले आयोजक र आर्थिक सहयोग गर्ने दाताहरू प्रति आभार प्रकट गर्दै धन्यवाद प्रदान गर्नु भयो । कार्यक्रममा सहभागिहरुले आगामी जनगणनामा नेपाल शेर्पा संघले अघि सारेको शेर्पा लेखौं, शेर्पा लेखाऔं अभियानलाई सफल पार्न लागि अगाडि बढ्ने प्रतिबद्धता व्यक्त गर्नु भएका थियोे ।

कार्यक्रम रामेछापको उमाकुण्ड र गोकुलगंगा गाउँपालिका क्षेत्रका शेर्पाहरुमाझ उक्त जनगणना सम्बन्धि अन्तक्र्रिया सम्पन्न भएको छ भने भोलि रामेछापको शैलुङ दोरम्बा गाउँपालिकामा हुने भएको छ ।