नेप्से पुनः १९ सयको मनोवैज्ञानिक विन्दुमुनि आउँदा १ अर्बको सेयर कारोबार, अब के होला ?

काठमाडौं : सोमबार १९ सय विन्दुमाथि उक्लिएको सेयर बजार सूचक नेप्सेले मंगलबार पुनः दबाबको सामना गरेको छ । यस दिन नेप्से सूचक ६.५९ अंकले घटेर १८९७.८६ विन्दुमा अडिएको छ । करिब १ अर्ब रुपैयाँको सेयर कारोबार भएको छ । अन्तिम प्रहरमा सेलरहरु सक्रिय हुँदा नेप्से पुनः १९ सय मनोवैज्ञानिक विन्दुभन्दा मुनि आएको हो । यसअघि सोमबार बजारले १८८० को तह परीक्षण गरेर माथितिर लागेको थियो । बजारमा लगानीकर्ताको मनोविज्ञानको अहम भूमिका हुने गर्छ । यसर्थ, न्यूनतम विन्दुमा आएको बजारको आगामी गति र प्रवृत्ति आम लगानीकर्ताको  मनोविज्ञानमा भर पर्ने देखिन्छ ।

बजार बढ्नका लागि लगानीकर्तामा सकारात्मक मनोविज्ञान विकास हुन आवश्यक हुन्छ । यता, प्राविधिक विश्लेषकहरुले भने नेप्सेले १८८० तथा १९०० आसपासको विन्दुहरुको परीक्षण गरिरहेको बताएका छन् । यी विन्दुहरुमा नेप्से टिक्छ वा टिक्दैन भन्ने महत्वपूर्ण पक्ष रहेको र सोही आधारमा ट्रेडरहरुले आगामी रणनीति बनाउनेछन् । दीर्घकालीन लगानीकर्ताका लागि भने यसले खासै फरक पर्दैन । यसअघि सूचक १८०७ विन्दुलाई परीक्षण गरेर फर्किसकेको छ ।

समग्रमा आगामी दिनहरु पुँजी बजारका लागि सकारात्मक हुने देखिन्छ । बैंकहरुले मंसिरमा ब्याजदर नबढाउने निर्णय गरेका छन् । ब्याजदर निकै माथिल्लो विन्दुमा पुगिसकेको र क्रमशः बैंकहरुमा लगानीयोग्य रकम पनि वृद्धि हुन थालेकाले पुस लागेसँगै ब्याजदर घट्दै जाने विश्लेषकहरुले अनुमान लगाएका छन् । त्यसो त

चुनावपछि केन्द्रीय बैंकले मौद्रिक नीतिको प्रथम त्रैमासिक समीक्षा गर्दैछ ।

समीक्षामार्फत ब्याजदर घटाउने टुल्सहरु आउने अनुमान गरिएको छ । यी परिपेक्ष्यमा अहिले होल्ड गर्न सक्नेले भविष्यमा राम्रो मुनाफा प्राप्त गर्न सक्नेछन् । सेयर भाउहरु पनि निकै तल्लो विन्दुमा आइसकेको छ । लाभांशको सिजन चलिरहेको छ । यी सबै सेयर बजारका लागि सकारात्मक पक्ष हुन् ।

यता, चुनावपछि नयाँ सरकार बन्नेछ । नयाँ सरकार बनेसँगै लगानीको नयाँ वातावरण बन्नेछ । अर्थ मन्त्रालयमा पनि नयाँ नेतृत्व आउन सक्नेछ । चुनावकै कारण बजारमा पैसाको आपूर्ति बढ्ने संकेतहरु देखिएका छन् । यतिबेला राजनीतिक दल र उम्मेदवारहरुले चुनावी प्रचारप्रसार र कार्यकर्ताका लागि ठूलै रकम खर्च गरिरहेको देखिन्छ । यो पैसा कुनै न कुनै तवरबाट वित्तीय प्रणालीमा आउने विश्लेषणहरु भइरहेका छन् ।

यस दिन २२९ कम्पनीको २७ लाख ४५ हजारभन्दा बढी कित्ता सेयर कारोबार भएको छ । ४ करोड २२ लाख रुपैयाँभन्दा बढीसहित कारोबार रकममा हिमालयन डिष्टिलरी अग्रस्थानमा रहेको छ । यसैगरी, दोस्रो र तेस्रो स्थानमा क्रमशः नेपाल लाइफ इन्सुरेन्स र नेपाल टेलिकम परेका छन् ।