रामेछाप । उमाकुण्ड गाउँपालिका, शिक्षा, युवा तथा खेलकुद शाखाको आयोजनामा सञ्चालन गरिएको पाँच दिने बाल विकास सहजकर्ताको लागि आवासीय तालिम आज सम्पन्न भएको छ। शिक्षाको सबैभन्दा आधारभूत र महत्वपूर्ण चरण मानिने प्रारम्भिक बाल विकासलाई सुदृढ बनाउने उद्देश्यले तालिम आयोजना गरिएको गाउँपालिकाले जनाएको छ।
उक्त समापन कार्यक्रमको अध्यक्षता सिद्वेश्वर माध्यमिक विद्यालयका प्रधानाध्यापक निर्मल प्रसाद त्रिपाठीले गर्नुभएको थियोे भने प्रमुख अतिथिको रुपमा उमाकुण्ड गाउँपालिकाका अध्यक्ष शेर बहादुर सुनवार रहनुभएको थियो।
कार्यक्रममा उमाकुण्ड गाउँपालिकाको शिक्षा अधिकृत ङावा शेर्पा, सिद्वेश्वर माध्यमिक विद्यालयका विव्यस अध्यक्ष प्रदिप बस्नेत, सिद्वेश्वर शिक्षा पब्लिक क्याम्पस बाम्तीका क्याम्पस प्रमुख जगदीश बस्नेत लगायत सरोकारवालाहरूको उपस्थित रहेको थियोे ।
सामुदायिक माण्टेश्वरी सिकाइ केन्द्र बाम्तीका बबिता कार्की र फुर्लाकी शेर्पाले सहजीकरण गर्नुभएको तालिममा उमाकुण्ड भित्रका ४० जना बाल विकास सहजकर्ता र विद्यालय कर्मचारीहरूको सहभागिता थियोे ।
आवास सहित सञ्चालन भएको कार्यक्रममा बालमैत्री शिक्षण विधि, खेल तथा सिर्जनात्मक गतिविधिमार्फत सिकाइ, बालबालिकाको मनोविज्ञान बुझ्ने तरिका, कक्षाकोठा व्यवस्थापन, विद्यार्थी मूल्यांकन तथा थोरै र कम पैसा पर्ने शैक्षिक सामग्री निर्माणजस्ता विषयमा व्यवहारिक र जीवनोपयोगी ज्ञान प्रदान गरिएको थियो।
गाउँपालिकाको बार्षिक कार्ययोजनाबाट सञ्चालन गरिएको उक्त तालिमलाई सहजीकरण गरिदिने प्रशिक्षकद्वयलाई गाउँपालिकाको अध्यक्ष शेरवहादुर सुनुवारले प्रशंसा पत्र तथा तालिममा सहभागीहरूलाई प्रमाणपत्र प्रदान गर्नुभएको थियोे ।
समापन कार्यक्रमलाई सम्बोधन गर्दै पालिका अध्यक्ष सुनुवारले गाउँपालिकाले उच्च प्राथमिकताका साथ शिक्षामा लगानी गरिरहेको र आगामी दिनमा पनि शिक्षक क्षमता अभिवृद्धिका कार्यक्रमहरू निरन्तर सञ्चालन गरिने बताउनुभयो।
Discussion about this post