बागमती प्रदेश युवा परिषद र उमाकुण्ड गाउँपालिकाको संयुक्त आयोजनामा लागू पदर्थ दुर्व्यसन सम्बन्धि कार्यक्रम सञ्चालन

रामेछाप । प्रदेश युवा परिषद् बागमती प्रदेश र उमाकुण्ड गाउँपालिकाद्वारा उमाकुण्ड गाउँपालिका-२, बाम्तीभण्डारमा तीनदिने लागु पदर्थ दुर्व्यसनी तथा साइबर क्राइम सम्बन्धि सचेतना कार्यक्रम आयोजना गर्ने भएको छ ।

बागमती प्रदेश सरकार, युवा तथा खेलकुद मन्त्रालय अन्तर्गत प्रदेश युवा परिषद्ले पौष १८ गतेदेखि २० गतेसम्म उमाकुण्ड भित्रका सम्पूर्ण युवायुवतीहरूलाई लक्षित गरी उक्त सचेतना कार्यक्रम सञ्चालन गरिने प्रदेश युवा परिषदकाे सदस्य छोटी लामाले बताइन् ।

विभिन्न मुलुकबाट नेपालमा लागु पदार्थ भित्र्याउने वा नेपाल हुँदै अन्य मुलुक लैजाने क्रम विगतदेखि नै चल्दै आएको कारण बर्सेनि लागु पदार्थ दुर्व्यसनमा संलग्न हुने व्यक्तिहरुको सङ्ख्या बढ्दै गएको छ । यसको साथै सूचना र प्रविधिको बढ्दो प्रयोगसँगै पछिल्लो समय देशभित्र हुने अपराधमध्ये साइवर अपराध तीव्र रुपमा वृद्धि भइरहेको छ ।

त्यसैगरी अशिक्षित तथा सामान्य साक्षर महिलाहरू समेत दलालको झुटो सपनामा आकर्षक तलब सुविधा होटल तथा लजमा बिलाशी दैनिकी बिताउन पाउने ठुला आशा बाँडेर चेलीबेटीलाई ललाईफकाई विदेशी कोठीहरूमा बच्ने गरेका छन् ।

घरायसी झगडा, बलात्कार र महिलाविरुद्ध हुने हिंसाका घटना नियन्त्रणका लागि लैङ्गिक समानताको अवधारणालाई व्यवहारमा सबै पक्षले लागु गर्नुपर्ने भन्दै उमाकुण्डमा प्रदेश सरकार अन्तर्गत प्रदेश युवा परिषद बागमतीद्वारा चेलीबेटी बेचबिखन, महिला हिंसा, जातीय / लैङ्गीक विभेद र सुशासन सम्बन्धि तीन दिने अन्तरक्रिया कार्यक्रम पनि सञ्चालन गरिने भएको छ ।

सामाजिक सञ्जालको बढ्दो प्रयोग, विदेशीसँग विवाह गर्ने क्रम र वैदेशिक रोजगारीमा जान चाहने महिलाको संख्या बढेसँगै बेचबिखनमा पर्ने जोखिम पनि बढेककाले उमाकुण्ड-२, बाम्तीभण्डारमा पौष २० गतेदेखि २२ गतेसम्म उक्त सचेतना कार्यक्रम मार्फत सुसूचित गरिने परिषदका सदस्य लामाले जानकारी दिइन् ।

युवाको हक हितको संरक्षण, सम्बर्द्धन र सशक्तीकरण गरी शिक्षा, सीप, उद्यमशीलता र रोजगारीमा युवाको प्रतिनिधित्व, भूमिका र योगदानलाई प्रबर्द्धन गर्दै समुन्नत प्रदेश र राष्ट्र निर्माण गर्नका लागि युवालाई समावेश गर्ने उद्धेश्यले युवा परिषद गठन गरिएको हो ।

प्रदेश सरकारले २०७७ साल बैशाख ३ गते प्रदेश युवा परिषद ऐन २०७६ प्रदेश राजपत्रमा सूचना प्रकाशित गरि प्रमाणीकरण गरी स्वीकृत भएपछि बागमती प्रदेश सरकारले उक्त परिषद गठन गरि युवा सम्बन्धि बजेट मार्फत विभिन्न कार्यक्रमहरू सञ्चालन गर्दै आएका छन् ।