सोलुखुम्बुमा सञ्चारकर्मीमाथी भएको हातपातको घटनाप्रति मानव अधिकार आयोगको चासो

सोलुखुम्बु : सोलुखुम्बु रिपोटिङको क्रममा खटिएका सञ्चारकर्मी माथी भएको आक्रमणको घटनाप्रति राष्ट्रिय मानव अधिकार आयोगले चासो व्यक्त गरेको छ । गत मंसिर १४ गते राती भएको उक्त घटनाको बारेमा आयोगको प्रदेश १ शाखा कार्यालय खोटाङले चासो व्यक्त गरेको हो ।

आयोगका प्रमुख श्यामबावु काफ्ले सहितको टोलीले शनिबार जिल्ला प्रहरी कार्यालय सोलुखुम्बुमा पुगेर सो विषयको कानुनी प्रगतीबारे जानकारी लिनुभएको छ । समाचार संकलनको क्रममा सञ्चारकर्मी माथी भएको हातपातको घटनालाई प्रहरीले कुन रुपमा अनुसन्धान गरिरहेको छ भन्ने विषयमा आफुहरुले छलफल गरेको आयोगका प्रमुख काफ्लेले बताउँनुभयो ।

जवाफमा प्रहरीले उक्त विषयलाई आफुहरुले गम्भिर रुपमा लिएर अनुसन्धान गरिरहेको जानकारी गराएको आयोगले जनाएको छ । गत मंसिर १४ गते राती नेपाली कांग्रेसको जिल्ला अधिवेशनको रिपोटिङमा खटिएका सञ्चारकर्मीद्वय सुबास दर्नाल र रमन बन माथी कांग्रेस कार्यकर्ताहरुले हातपात गरेका थिए ।

आक्रमणबाट रिपोटिङमा प्रयोग गरिएको माईक, रेर्कडर, मोबाईल सेट लगायतका सामाग्रीमा क्षति पुगेको छ । घटना लगत्तै पिडित सञ्चारकर्मीद्वयले किटानी जाहेरी सहित प्रहरीमा मुद्धा दायर गरेको भएपनि घटनामा संलग्नहरु अझै पक्राउ पर्न सकेका छैनन् ।

समाचार संकलनमा खटिएका सञ्चारकर्मी माथी प्रहरीकै अगाडी आक्रमण हुँदा समेत दोषीले एक महिना देखि उन्मुक्ति पाइरहनु दुखद भएको राष्ट्रिय मानव अधिकार आयोगको ठहर छ । सोलु समाचार ।