दुई लाख ३९ हजारले लगाए दोस्रो मात्रा भेरोसेल खोप

काठमाडौं । जेठ २ गतेबाट शुरु भएको दोस्रो चरणको खोप अभियानमा दुई लाख ३९ हजारभन्दा बढी व्यक्तिले भेरोसेल खोपको दोस्रो मात्रा (डोज) लगाएका छन् ।
चीन सरकारले उपलब्ध गराएको भेरोसेल खोप जेठ २ देखि ११ गतेसम्म काठमाडौं, भक्तपुर, ललितपुर, रसुवा, नुवाकोट, सिन्धुपाल्चोक र काभ्रेपलाञ्चोक जिल्लामा दोस्रो चरणको मात्रा (डोज) दिन शुरु गरेको स्वास्थ्य सेवा विभागका खोप शाखा प्रमुख डा. झलक गौतमले बताउनुभयो ।
खोप शाखा प्रमुख डा. गौतममा अनुसार दुई लाख ८९ हजार ४१७ जनालाई भेरोसेल खोपको दोस्रो डोज दिने लक्ष्य लिइएको थियो । तर, यसअवधिमा दुई लाख ३९ हजार २५३ जनाले मात्र दोस्रो डोज खोप लगाएका छन् ।
जसमध्ये रसुवामा ९४३, सिन्धुपाल्चोका १७०, नुवाकोटमा एक हजार ७८६, काठमाडौंमा एक लाख ५० हजार ६७८, भक्तपुरमा ३६ हजार ८७१, ललितपुरमा ४३ हजार ७१९ र काभ्रेपलाञ्चोकमा पाँच हजार ९६ जनाले दोस्रो मात्राको खोप लगाएका छन् ।
प्रमुख गौतमका अनुसार पहिलो मात्रा भेरोसेल खोप लगाएका दुई लाख ८९ हजार ४१७ मानिसलाई दोस्रो मात्राको खोप लगाउन शुरु गरेकोे थियो । जसमध्ये ८२.७ प्रतिशतले मात्र दोस्रो मात्राको खोप लगाएका छन् ।
दोस्रो मात्राको खोप ४० देखि ५९ वर्षका लाई दिइएको भएपनि पहिलो मात्राको खोप १८ वर्षमाथिका व्यक्तिले पनि लगाउनुभएका कारण उहाँहरुलाई पनि दोस्रो मात्राको खोप लगाइएको गौतमले बताउनुभयो ।
केही हप्ता अघि विश्व स्वास्थ्य संगठनले आपत्तकालीन प्रयोग अनुमति दिएको भेरोसेल खोप चीन सरकारले नेपाललाई आठ हजार मात्रा अनुदानमा दिएको थियो ।
त्यस्तै खोप शाखाका प्रमुख गौतमका अनुसार अर्थात् जेठ १२ गतेदेखि भारतबाट ल्याइएको कोभिसिल्ड खोपको खोपको दोस्रो मात्र दिन शुरु गरिएको छ ।
स्टकमा बाँकी रहेको एक लाख कोभिसिल्ड खोप प्राथमिकता तोकेर ७७ वटै जिल्लामा हिजोबाट दिन शुरु गरिएको उहाँले बताउनुभयो ।
नेपालको सातै प्रदेशमा माघ १४ गतेदखि कोभिड खोप लगाउन शुरु गरिएको थियो । भारत सरकारको सहयोगमा ल्याइएको १० लाख मात्रा कोभिसिल्ड स्वास्थ्यकर्मीहरुलाई लगाएर पहिलो चरणको खोप अभियान शुरु गरिएको थियो ।
भारतको सीरम इन्स्टिट्यूटले उत्पादन गररेको कोभिसिल्ड खोप अभावका कारण नेपालमा दोस्रो मात्रा लगाउने योजना अनिश्चित भएको थियो । यद्यपी स्टकमा रहेको एक लाख खोप प्राथमिकता तोकर ७७ वटै जिल्लामा हिजोबा लगाउन शुरु गरिएको गौतमले बताउनुभयो ।