भुजीमा अन्तरपालिका खुल्ला महिला भलिबल प्रतियोगिता हुँदै

रामेछाप । रामेछापको उमाकुण्ड गाँउपालिका वडा नम्बर ७ को प्रयोजन तथा वडा स्तरीय खेलकुद विकास समिति वडा नम्बर ७ को आयोजनामा अन्तरपालिका स्तरीय खुल्ला महिला भलिबल प्रतियोगिता हुने भएको छ ।

नव बर्ष २०८१ को अवसरमा यही चैत्र २८ देखि चैत ३० सम्म हुने प्रतियोगितामा १२ टिम सम्म सहभागी भए लिगकम नकआउट र सो भन्दा बढी सहभागी टिम भए नकआउटका आधारमा खेल खेलाइने उमाकुण्ड खेलकुद विकास समितिका अध्यक्ष सुदीप सुनुवारले सूचना मार्फत जानकारी दिनुभएको छ ।

खेलकुद विकास समिति वडा नम्बर ७ ले सार्वजनिक गरेको सूचनाअनुसार प्रथम, द्वितिय, तृतिय र सान्त्वना पुरस्कारको राशी क्रमशः ६० हजार, ४० हजार , २० हजार तथा १० हजार तोकिएको छ भने साथमा ट्रफी, मेडल र प्रमाणपत्र प्रदान गरिने भएको छ । त्यस्तै उत्कृष्ट खेलाडी, स्पाइकर, लिब्रो, सेन्टर र ब्लकरलाई पनि नगद पुरस्कार, ट्रफी तथा प्रमाणपत्र प्रदान गरिनेछ ।

उक्त प्रतियोगिताका लागि चैत्र २६ भित्र टिम दर्ता गराइसक्नुपर्ने र चैत्र २७ गते खेलको टाइसिट प्रकाशन गर्ने गरि तयारी भएको खेल उमाकुण्ड गाँउपालिका वडा नम्बर ७ को कार्यालय प्राङ्गणमा हुने भएको छ ।

प्रतियोगिताको सहभागिताको दर्ता शुल्क तोकिएको छैन भने एक टिमको खेलाडीहरु एकै पालिका भित्रको मात्र हुनुपर्ने व्यवस्था गरिएको छ । त्यस्तै खेलाडीहरुले खाना बस्ने व्यवस्था आफैले गर्नुपर्ने र खेल फिभ्वको नियम अनुसार खेलाइने भएको सूचनामा उल्लेख छ ।